ກໍາມະບານຮາກຖານພະແນກໄປສະນີ, ໂທລະຄົມມະນາຄົມແລະການສື່ສານແຂວງຫົວພັນສຳເລັດກອງປະຊຸມໃຫຍ່ຄັ້ງທີ I

ພຸດ ພີມທະສອນ

ວັນທີ່ 4 ຕຸລາ 2019 ນີ້, ກໍາມະບານຮາກຖານພະແນກໄປສະນີ, ໂທລະຄົມມະນາຄົມ ແລະ ການສື່ສານແຂວງໄດ້ເປີດກອງປະຊຸມໃຫຍ່ຄັ້ງທີ່ I ຂັ້ນຂອງຕົນຂື້ນ ທີ່ຫ້ອງປະຊຸມພະແນກ, ເປັນກຽດເຂົ້າຮ່ວມພິທີໂດຍທ່ານນາງ ຟອງທໍາ ທໍາມະທອງ ຮອງປະທານກໍາມະບານແຂວງ, ມີບັນດາທ່ານແຂກຖຶກເຊີນຈາກພາກສ່ວນກ່ຽວຂ້ອງ ພ້ອມດ້ວຍສະມາຊິກກໍາມະບານເຂົ້າຮ່ວມ 24 ທ່ານ, ຍິງ 14 ທ່ານ.

ກອງປະຊຸມຜູ້ເຂົ້າຮ່ວມຍັງໄດ້ຮັບຟັງ ສະຫາຍ ຄໍາຍອດ ຄຸນປາກດີ ປະທານກໍາມະບານຮາກຖານກໍາມະບານ ພະແນກໄປສະນີ, ໂທລະຄົມມະນາຄົມ ແລະ ການສື່ສານແຂວງ ຜ່ານບົດລາຍງານການເມືອງສະຫຼຸບຕິລາຄາສະພາບລວມການຊີ້ນຳນຳພາໃນໄລຍະຜ່ານມາ ແລະ ທິດທາງແຜນການສູ້ຊົນ ເຊີ່ງໄດ້ຍົກໃຫ້ເຫັນຜົນງານດ້ານດີຫຼາຍດ້ານ ແລະ ດ້ານອ່ອນຄົງຄ້າງທີ່ຕ້ອງປັບປຸງແກ້ໄຂ,  ຜູ້ເຂົ້າຮ່ວມຍັງໄດ້ປະກອບຄຳຄິດຄຳເຫັນໃສ່ບົດລາຍງານການເມືອງ ແລະ ທິດທາງແຜນການສູ້ຊົນຕໍ່ໜ້າ, ໃນນັ້ນກອງປະຊຸມຄະນະປະທານກໍາມະບານຊຸດເກົ່າ ກໍ່ໄດ້ອຳລາໜ້າທີ່ ແລະ ຜູ້ຕາງໜ້າສະຫະພັນກໍາມະບານແຂວງໄດ້ຜ່ານມະຕິມາດຖານຜູ້ສະໝັກ ແລະ ສະມາຊິກກໍາມະບານ ຮາກຖານພະແນກໄປສະນີ, ໂທລະຄົມມະນາຄົມ ແລະ ການສື່ສານ ກໍ່ໄດ້ໃຊ້ສິດປະຊາທິປະໄຕປ່ອນບັດເອົາຄະນະໜ່ວຍກໍາມະບານຊຸດໃໝ່ຄື: ສະຫາຍ ຄໍາຍອດ ຄຸນປາກດີ ເປັນປະທານ, ສະຫາຍ ຄໍາວົງສາ ວັນນະດິດ ເປັນຮອງປະທານທັງເປັນປະທານກວດກາ, ສະຫາຍ ນາງ ມີລາວັນ ພົມມະເທບ ເປັນຄະນະ ແລະ ສະຫາຍ ເມສາ ພົມວົງສາ ເປັນຮອງປະທານກວດກາ. ພ້ອມນັ້ນຄະນະຊຸດໃໝ່ຍັງໄດ້ຮັບປະຊາມະຕິ ແລະ ຈະຕັ້ງໜ້າປະຕິບັດວຽກງານໃຫ້ປະສົບຜົນສຳເລັດທີ່ສະມາຊິກກໍາມະບານໄວ້ວາງໃຈ.

ໃນທ້າຍກອງປະຊຸມຍັງໄດ້ຮັບຟັງການໂອ້ລົມຂອງທ່ານນາງ ຟອງທໍາ ທໍາມະທອງ ຮອງປະທານກໍາມະບານແຂວງ,ກ່ອນອື່ນ ສະຫາຍໄດ້ຍ້ອງຍໍຊົມເຊີຍຜົນງານທີ່ຍາດມາໄດ້ໃນໄລຍະ 5 ປີຜ່ານມາ ແລະ ໄດ້ເນັ້ນໃຫ້ສຶບຕໍ່ສຶກສາອົບຮົມດ້ານການເມືອງ-ແນວຄິດ, ຄວາມສາມັກຄີ ພາຍໃນ-ພາຍນອກໃຫ້ໜັກແໜ້ນ ແລະ ສຸມໃສ່ການສ້າງເສດຖະກິດຄອບຄົວໃຫ້ດີຂຶ້ນ. ສະຫະພັນກໍາມະບານແຂວງຍັງໄດ້ມອບໃບຍ້ອງຍໍ ຜົນງານດີເດັ່ນໃນການຈັດຕັ້ງເຄື່ອນໄຫວວຽກງານຮອບດ້ານໃນໄລຍະ 5 ປີ ຜ່ານມາ ນັບແຕ່ 2014-2019 ໃຫ້ກໍາມະບານຮາກຖານພະແນກ ແລະ ສະມາຊິກຜູ້ທີມີຜົນງານດີເດັ່ນໃນການຈັດຕັ້ງເຄື່ອນໄຫວວຽກງານຮອບດ້ານໃນໄລຍະ 5 ປີອີກດ້ວຍ.

Subscribe US Now